اسلام آباد (شہرنامہ نیوز)کیپٹن محمد سرور شہید کا 78 واں یوم شہادت آج منایا جایا رہا ہے ۔ صدر ، وزیراعظم ،فیلڈ مارشل عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے کیپٹن محمد سرور شہید (نشان حیدر) کے یوم شہادت پر انہیں زبردست خراج عقیدت پیش کیا ہے۔ کیپٹن محمد سرور نے 27 جولائی 1948 کو پہلی کشمیر جنگ کے دوران آزاد کشمیر کے تلپترہ سیکٹر میں دشمن کے خلاف بہادری سے لڑتے ہوئے جامِ شہادت نوش کیا۔ کیپٹن سرور دشمن کی مضبوط دفاعی پوزیشن پر حملے کی قیادت کر رہے تھے۔ شدید فائرنگ کے باوجود انہوں نے اپنی بٹالین کو آگے بڑھایا اور دشمن کے مورچوں کو خاموش کرانے کی کوشش کے دوران شہید ہوئے۔ ان کی غیر معمولی بہادری، جرات اور قیادت کے اعتراف میں انہیں بعد ازاں پاکستان کا اعلیٰ ترین فوجی اعزاز نشانِ حیدر عطا کیا گیا، اور وہ یہ اعزاز حاصل کرنے والے پاکستان کے پہلے شہید بنے۔ صدرِ مملکت آصف زرداری نے کیپٹن محمد سرور شہید کو 78 ویں یوم شہادت پر خراجِ عقیدت پیش کرتے ہوئے کہا کہ کیپٹن سرور شہید نے آزادیٔ کشمیر کے لیے اپنی جان کا نذرانہ پیش کرکے فرض، شجاعت اور حب الوطنی کی لازوال مثال قائم کیا۔ صدر زرداری نے کہا کہ کیپٹن سرور شہید نے قومی تاریخ میں ایسا باب رقم کیا جسے آنے والی نسلیں ہمیشہ احترام اور فخر کے ساتھ یاد کرتی رہیں گی۔ وزیراعظم شہباز شریف نے اپنے پیغام میں کہا کہ قوم کیپٹن محمد سرور شہید کی عظیم قربانی کو خراج عقیدت پیش کرتی ہے، کیپٹن محمد سرور شہید نے 27 جولائی 1948 کے دوران دشمن کا مقابلہ کیا۔ وزیراعظم نے کہا کہ کیپٹن محمد سرور شہید کو وطن کی خاطر قربانی کے اعزاز میں نشان حیدر سے نوازا گیا، کیپٹن محمد سرور شہید جیسے بہادر سپوت پاکستان کے ناقابل تسخیر دفاع کی ضمانت ہیں۔ انہوں نے کہا کہ کیپٹن محمد سرور شہید نے ثابت کیا کہ دفاع وطن میں قوم سیسہ پلائی ہوئی دیوار ہے، کیپٹن محمد سرور شہید کا جذبہ حب الوطنی آنے والی نسلوں کے لیے بھی مشعل راہ ہے،پوری قوم کو کیپٹن سرور شہید سمیت تمام بہادر شہداء پر فخر ہے۔ پاک فوج کے شعبہ تعلقات عامہ (آئی ایس پی آر) کے مطابق 27 جولائی 1948ء کو پہلی کشمیر جنگ کے دوران آزاد کشمیر کے علاقے تل پترا میں کیپٹن محمد سرور شہید نے کشمیر کی آزادی کیلئے فرض کی ادائیگی کے دوران جامِ شہادت نوش کیا اور پاکستان کے پہلے نشان حیدر حاصل کرنے والے عظیم سپوت بنے۔
کیپٹن سرور شہید کا 78 واں یوم شہادت،شہید کی قربانی ناقابلِ فراموش، قومی قیادت کا خراجِ عقیدت
