تہران نے ثالثوں کے ذریعے مذاکرات میں امریکی تجاویز مسترد کردیں:کاظم غریب آبادی

تہران(شہرنامہ نیوز)ایران کے نائب وزیرخارجہ کاظم غریب آبادی نے کہا ہے کہ ایران نے یہ اقدام امریکا کے بے جا مطالبات کے سبب کیا ہے۔ایران کے نائب وزیرخارجہ کاظم غریب آبادی نے انکشاف کیا ہے کہ بات چیت اسلام آباد میں شروع ہوئی تھی، امریکا نے ایسا منصوبہ پیش کیا جس میں بے جا مطالبات تھے جس پر ایرانی وفد نے منصوبہ واضح طور پر مسترد کر دیا۔انہوں نے کہا کہ امریکا نے اعلان کیا تھا کہ اگر یہ منصوبہ مسترد کر دیا گیا تو مذاکرات کو ناکام سمجھا جائے گا اور امریکی وفد واپس چلا جائے گا، بات چیت کے آخر میں ہوا بھی یہی اور امریکی وفد بات چیت چھوڑ کر چلا گیا۔غریب آبادی نے بتایا کہ ایرانی وفد نے نہ تو اس بات پر زور دیا اور نہ ہی درخواست کی کہ مذاکرات کا سلسلہ جاری رکھا جائے اور یہ نقطہ نظر اس بات کی مثال ہے کہ ایران باوقار انداز سے سفارتکاری کررہا ہے۔انہوں نے آبنائے ہرمز کی صورتحال پر بھی بات کرتے ہوئے کہا کہ ایران کی جانب سے آبنائے ہرمز دوبارہ بند کئے جانے کے بعد عمان میں بھی بات چیت ہوئی۔عمانی وفد نے زور دیا کہ جہازوں کی آمدورفت کیلئے کھولا گیا جنوبی راستہ اس وقت تک کھلا رکھا جائے جب تک کہ ایران اور عمان کے درمیان کسی نتیجے پر پہنچتے ہیں اور بعد میں یہ راستہ بند کردیا جائے مگر ایران نے اس تجویز کو قبول نہیں کیا۔غریب آبادی نے کہا کہ ایران نے واضح کیا کہ بات چیت کا نتیجہ خواہ کچھ بھی ہو، جنگ کے آغاز ہی سے ایران کی اصولی پالیسی واضح ہے اور وہ یہ کہ ایسی تجاویز قبول نہیں کی جائیں گی۔انہوں نے مزید کہا کہ آبنائے ہرمز کو بند رکھنےکی پالیسی برقرار ہے اور یہ بھی ایران کی باوقار سفارتکاری کی دوسری مثال ہے۔